Satua Bawak Aksara Bali

 

Aksara Bali Satua I Belog

 

AKSARA BALI CUPAK GERANTANG

 SATUA AKSARA BALI

SATUA I CICING GUDIG

 Satua Bali - I Cicing Gudig

Nah ada kone tuturan satua I Cicing Gudig. I Cicing Gudig, buka adanne berag tegreg tur keskes gudig, sing jalana mlispis ada dogen anak ngesekang wiadin ngaltig. Sai-sai kone ia maselselan, nyelselang buat kalacuranne tumbuh dadi cicing makejang anake tuara ngiyengin.

Sedek dina anu I Cicing Gudig mlispis di pekene. Ada kone anak madaar di dagang nasine, ento kone nengnenga menek tuunanga dogen. Kene kenehne I Cicing Gudig, "Yan i dewek dadi manusa buka anake ento, kenken ya legan nyete ngamah, mebe soroh ane melah-melah. Ah kene baan, nyanan petenge lakar mabakti ke Pura Dalem, mapinunas teken Batari Durga apang dadi manusa."

Kacrita suba peteng, mabakti kone lantas I Cicing Gudig di Pura Dalem. Medal lantas Ida Betari Durga tur ngandika teken I Cicing Gudig, "Ih iba Cicing Gudig, dadi iba ngacep nira, apa katunasang?" Masaut I Cicing Gudig, "Inggih paduka Betari, yan paduka Betari ledang, titiang mapinunas mangda dados manusa."

Kalugra kone pinunasne I Cicing Gudig, lantas ia dadi jlema. Dening I Cicing Gudig tusing bisa ngalih gae, tusing pati kone ngamah. Mara-maraan ngamah ulihan maan mamaling. Pepes kone ia katara mamaling. Lantas buin kone ia mabakti di Pura Dalem. Medal lantas Ida Betari Durga tur ngandika teken I Cicing Gudig, "Ih iba cai I Cicing Gudig, ngenken dadi iba buin mai?" Matur I Cicing Gudig, "Inggih paduka Betari, titiang tan wenten demen dados manusa panjak. Yan paduka Betari ledang, titiang mapinunas mangda dados "Patih". Ida Betari Durga lugra.

Nujuang pesan kone dugase ento Ida Sang Prabu ngrereh buin adiri. I Cicing Gudig lantas kandikaang dadi Patih, tur I Cicing Gudig ngiring."Beh keweh pesan i dewek dadi Pepatih, tusing maan ngenken-ngenken, begbeg pesan kandikayang tangkil ka puri. Yan i dewek dadi Anak Agung, kenken ya legan nyete nunden-nunden dogen." Keto kenehne I Cicing Gudig. Nyanan petengne buin kone ia mabakti di Pura Dalem, mapinunasang apang dadi Anak Agung. Ida Betari Durga lugra, lantas patuh pesan kone goban I Cicing Gudige teken warna Ida Sang Prabu.

Kacrita sedek dina anu Sang Prabu lunga maboros ka alase, macelig kone I Cicing Gudig ka puri. Dening patuh goban I Cicing Gudige teken Ida Sang Prabu, dadi kasengguh Ida Sang Prabu kone ia baan I Patih muah teken prayogiane ane len-lenan.

Matur I Patih saha bakti, "Titiang mamitang lugra Ratu Sang Prabu, punapi awinan dados Cokor I Ratu paragayan tulak saking paburuan?" Masaut I Cicing Gudig, "Kene Patih, mawinan nira tulak, saking nira ngiringang sabdan Betara, tan kalugra nira malaksana mamati-mati. Kandikayang lantas nira tulak. To juru borose ada pinunasa teken nira, tusing ngiring mantuk, krana kadunga suba makenaan. Nira nglugrahin, mawanan tan pairingan nira mulih." Keto pamunyinne I Cicing Gudig, teka jag ngugu kone I Patih muah panjake ane len-lenan.

Kacrita sai-sai kone I Cicing Gudig ngraosin anak mawikara. Reh Cicig gudig tuara nawang lud, makejang wikaran anake pelih baana ngundukang, ane patut menang kalahanga, anak patut kalah menanganga. Mawanan kaupet kone I Cicing Gudig dadi Agung, sawai-wai ngencanin anak mawikara dogen. Yan I Dewek okan Anak Agung, kenken ya demene, kema mai malali iringang parekan, di kenkene magandong, buina tusing pesan ngitungan apan-apan, sajawaning ngamah teken malali dogen.

Nyanan petengne, mabakti kone buin I Cicing Gudig di Pura Dalem, mapinunas apang dadi okan Anak Agung. Ida Betari Durga lugra. Patuh lantas gobanne I Cicing Gudig buka warnanida Raden Mantri.

Buin mani semenganne, maorta ilang kone lantas Ida Raden Mantri. Ya sedeng ewana jerone ngibukang Raden Mantri, deleng-deleng kone lantas I Cicing Gudig ngapuriang. Reh Cicing Gudig kasengguh Raden Mantri, makesiar kone keneh wang jerone makejang.

Kacrita jani I Cicing Gudig kapurukang malajah masastra. Dening asing ajahina muah takonina I Cicing Gudig tuara karoan baana apa, saapan kone lantas gurune ngemplangin I Cicing Gudig. "Koang," keto kone aduhanne I Cicing Gudig. Dening keto, buin kone pasangetina ngemplangin I Cicing Gudig. "Koang," keto kone buin aduhanne. Buin kemplangina tur pasangetina, buin kone I Cicing Gudig makoangan. Brangti kone lantas gurunne, lantas ia nyemak penyalin anggona nigtig I Cicing Gudig, kanti enceh-enceh, mara kone suudanga.

Kacrita nyanan petengne kone ka Pura Dalem lantas I Cicing Gudig mabakti, mapinunas apang buin dadi Cicing Gudig buka jati mula. I Cicing Gudig lantas buin dadi cicing gudig. puput 

sumber : masatuabali.blogspot.com

AKSARA BALI I CICING TEKEN I KAMBING

SATUA AKSARA BALI

 

I SIAP SELEM

 

Satua Bali - I Siap Selem

Ada katuturan satua I Siap Selem ngelah pianak pepitu. Ane paling cerika tusing ngelah bulu madan I Doglagan. Sawai-wai I Siap Selem ngalih amah nganti ke dauh pangkunge. Sedek dina anu ritatkala I Siap Selem teken panak-panakne ngalih amah dauh pangkunge, lantas langite megerudug nyihnayang lakar ujan.

“Me, lan jani mulih. Ento guleme gede gati” keto pianakne kelihan ngomong.

“Ao me yang takut nyanan iraga ujanan dini” pianakne lianan milu masaut

“Cening jak mekejang, lan jani ditu di umahe ento malu maembon.

Yen jani iraga mulih pedas iraga ujanan. Tolih ento adine, I Doglagan. Ia tusing ngelah bulu. Yen ia ujanan pepes bisa mati” keto I Siap Selem maorahan teken pianak-pianakne. Lantas I Siap selem teken pianakne makapitu ngungsi keumahe ane ada di sisin pangkunge ento.

“Jero jero sane madue pondok niki, dados ke tiang milu maembon?” keto I Siap Selem metakon.

Lantas pesu ane ngelah umahe ento boya ja sios wantah meong lua madan Meng Kuuk.

“Ngeong ngeong.. ih cai Siap Selem ngujang cai mai?”

“Jero Meong, tiang mriki jagi maembon mawinan tiang madue pianak-pianak kari alit. Tusing melah keneh tiange ngajakin ngrobok ujan”.

“Nah lamun buka keto, lan mai macelep ka tengah” ditu lantas Meng Kuuk ngajakin I Siap Selem tekening pianakne mulihan. Sajaan lantas tuun ujan bales pesan ngaenang pangkunge blabar.

Meng Kuuk nanjenin I Siap Selem apanga nginep di umahne. I Siap Selem nyak nginep kerana ia pedalem teken pianakne. Petengne I Siap Selem tusing ngidayang pules. Ditu lantas ia ningeh Meng Kuuk mererembug ajaka pianak-pianakne.

“Cening ajak mekejang, petenge ene iraga lakar pesta besar. Ne meme ngelah siap pengina ngajak pianak makapitu” keto munyine Meng Kuuk.

“Tiang baang kibulne me!” keto pesaut panakne

“Tiang baang kampidne me!” pianakne len milu mesaut

Ningeh tutur Meng Kuuke teken pianak-pianakne buka keto, lantas I Siap Selem nundunin pianak-pianakne

“Ning bangun ning. Ento Meng Kuuk nagih ngamah iraga. Mai jani iraga megedi uling dini. Cening malu mekeber nyanan Meme ngemilunin”. Lantas seka besik pianak I Siap Seleme makeber ngecosin pangkung.

Brrr.. Burr.. Suuak… Keto pianakne ane paling keliha makeber.

“Apa ento Siap Selem?” metakon Meng Kuuk

“Ento don timbule ulung” keto I Siap Selem nyautin

Brrr.. Burr.. Suuak… keto pianakne lenan makeber .

“Apa ento Siap Selem?” Meng Kuuk buin mtakon

“Ento don tiinge ulung” pesautne Siap Selem.

Lantas seka besik pianakne I Siap Selem mekeber ngentasin pangkung. Jani enu I Siap Selem teken I Doglagan dogen ditu di umahne Meng Kuuk. Mabesen lantas I Siap Selem teken I Doglagan.

“Cening Doglagan, jani Meme lakar ngalahin cening dini. Nyanan yen lakar amaha teken I Meng Kuuk, duegang bane madaya. Orahang eben caine nu pait, nu belig, sing pantes daar malu. Tunden Ia ngubuhin cai nganti tumbuh bulu. Yen suba tumbuh bulun caine, ditu lantas cai keberang ibane mulih”.

Lantas I Siap Selem makeber ngentasin pangkung. Brrr.. Burr.. Suuak… keto munyin pakeber I Siap Seleme.

“Apa ento Siap Selem?” mtakon lantas I Meng Kuuk. Tusing ada ne nyautin. Ditu lantas I Meng Kuuk nelokin pedemane I Siap Selem. Mekesiab lantas ia mare dapetanga tuah ada I Doglagan ditu.

“Beh, pasti busan ane orahange don-donan ulung ento boya ja len wantah I Siap Selem teken pianak-pianakne”

“Meme kanggoang dogen suba pitike cenik ene daar” keto panakne mamunyi.

“Duh jero para meong sinamian, sampunang tiang ajenga mangkin. Tiang konden tumbuh bulu sinah eben tiange pait, belig, miwah ten jaan ajeng. Pinih becik ubuhin dumun tiang nganti tumbuh bulu, drika wawu dados ajeng tityang” I Doglagan mautsaha madaya upaya apang sing amaha teken I Meng Kuuk lan pianak-pianakne.

I Meng Kuuk kena baana kabelog-belog baan I Doglagan. Ia nyak ngubuhin I Doglagan. I Doglagan wadahina guungan lan sabilang wai baanga ngamah. Gelising satua jani bulun I Doglagane suba tumbuh. Meng Kuuk lan pianakne pada repot ngae lakar basa anggona ngolah ben Doglagane.

“Eh cai Doglagan, jani cai lakar amah kai”

“Nggih dados nika jero. Nanging apang eben tiange jaanan, keburang dumun tiang ping telu”

Meng Kuuk lantas ngeburang I Doglagan. Prrrr. Prrrr. Prrrr. Pas keburane ping telu mekeber lantas I Doglagan. Joh pakeberne lantas ngenceg duur batune. Meng Kuuk nguber I Doglagan lan tingalina ia ngenceg duur batune. Meng Kuuk nyagrep nanging I Doglagan ngenggalang makeber. Ane sagrepa I Meng Kuuk boya ja len tuah batu ane ngranaang gigine pungak. I Doglagan makeber sambilanga ngendingin I Meng Kuuk.

“Ngik ngak ngik nguk gigi pungak nyaplok batu. Ngik ngak ngik nguk gigi pungak nyaplok batu.”

Keto suba upah anake ane demen mebikas corah. Iraga mangda setata madaya upaya yening nepukin unduk lan ngelawan sane mabikas jele.

Sumber : Koleksi Pribadi Buku Satua Bali I Nengah Tinggen

KAMBING TAKUTIN MACAN

 

Satua Bali - Kambing Takutin Macan

Kacerita sedek dina anu, ditu dialase rang-rang. Alase nedeng luwung gadang, bet ulian kekayuane ane mentik tur liu padang lan don-donan ane ngude tur lempung lempung

Kaceritayang ada kambing dadua madan ni mesaba ngelah panak aukud madan ni wingsali. Ni mesaba ajak ni wingsali luas katengah alase ngalih amah-amahan.

“miiihhh, yen kene unduke, sinah lakar betek basange jani ning”

“saja meee, don-donane nguda-nguda gaaaatii, jaan-jaan gati meee”

 

Sedeng itehe ngamah, saget makesiab ni wingsali nepukin ade buron tawah, laut malaib ia ka durun memene sambilange matakon.

“memeee,,, memeee,,,,,, ada buron tawah mee, to to ye ditu meee,,, adu meee,, ikutne lantang, gobane aaaeeeng, jejeh tiang meeee.”

Masuat ni mesabe “ceeennn cen cen,,, eeeeehhhh ento je tusing lenan teken I macan ning.”

“Aduuuhh memeeeee,, takut tiang meeee,,,”

“nahh, kene jani ning, entegang sebenge, apang ngenah cara anak sakti.”

 

Suba keto, nyagjag lantas I macan. I macan ngon ningalin ni mesaba teken ni wingsali ulian ia tusing taen nepuk kambing lantas ngomong kene.

“eeeehhhhh,,, buuuron apa saja iba, dadi wanen ngelincak di gumin wakene. Awake madan I Macan, panguasa, ane ngitahin sekancan burone di alase. Tusing ade ane wanen teken awake dini.”

Masaut ni mesaba “eemmbbbeekk,,, ehhhhhh iba macan miiirib iba tusing nawang, uling awak kaine bisa pesu api,, neee nee ditanduk kaine ida betara siwa ane malinggih, kai kaliwat sakti tur aeng, kai suba bisa ngamah macan lelima acepokan, jani sing buungan iba lakar amah kai” sambilanga makecos tur ngengkotang tanduk ne.

 

I Macan sahasa malaib ban keliwat jejehne tekening I mesaba. Sedeng malaib pati kaplug, tepuka lantas I bojog uling baduur punyan kayune.

“biih, ento tusing ja lenan teken I macan, apa plaibine” keto dikenehne I bojog lantas tuun I bojog uling punyan kayune.

“iihh bli macan, ape keh plaibin kanti sengal sengal keto angkiane” masaut I Macan “hahhh hahh hahhh, ihhh I bojog, wake mare nepukin buron sakti, uuuling awakne ngidaang pesu api kone, ikutne tukung, kupingne lantang, awakne poleng, misi tanduk, ye burone kone sing ade tandingane, bin bedik gati awake nagih sagrepe teken burone to, jejeh bane.”

Ningeh munyine I macan prejani I bojog kedek. “heh heh heh,, tong mecanda bli, ento tusing je lenan tekan I kambing bli. Ia tusing je buron sakti tur aeng, sujatine kambing ento anak beloog, pidan tiang masi maan masawitra teken ia ulian toh-tohan, jani nu masi mamusuh. Kene jani, mai lipetin kambinge ento.”

Masaut I macan, “ihhh sing nyak awake, yen kemu lipetin sinah lakar sagrepe, yen cai elah makecos misi ngelanting di punyane”

Lantas mesaut I bojog, “biiiiihhhh tung, bli bes keliwat belog, bli,, tiang sing jejeh teken burone ento sing be tiang nguluk – nguluk, bli jani jalananng tegul ikute di awak tiange pang sing ngidang tiang melaib.”

Lantas nyak I macan negul ikutne ajake dadue, lantas ia ngalih ni mesaba.

Nengked di mukakne ni mesaba, ngenggalang ni mesaba ngentegang sebengne, lantas ngomong “ iiihh caii bojog, dugase ci kalah metoh tohan, nu inget cai, Kaden cai mejanji lakar ngemaang macan patpat, miiihh ne jani cai mare ngabe aukud, nah nah,, kal kanggoang masi, sedeng melaha nee, kai ngidamang be macan, maii maii tegarang abe mai, kar sanggrap jani, turr getihne kal siup anggon ngilangang bedak.”

Ningeh munyine ni mesabe, I macan buin ngejer, “aruuuhhhh, kai belog-beloge ne teken I bojog, kai anggone mayah utang “ ketooo kenehne I macan. Ban sanget jejehne I macan, melaib pati kaplug I bojog milu mapaid. Ban keliwat jejeh ne, tusing asena baisne nyejek jurang lantas ulung makadadua, magrudugan ajake dadua, tur ia ngemasin mati.

Sumber : Koleksi Pribadi Buku Satua Bali I Nengah Tinggen